عن المخدرات

ولد ماحصلش العشرين 

لكن مفرط في شبابه
 

مالقاش صديق ناصح وأمين

ولا أب يعمل له حسابه
 

الدنيا دي ماهيش عجباه 

ونظامها عاوز تغييره
 

مش فاهم ان ده حكم إله

تتوه عقولنا في تدبيره
 

ساخط تمللي وضارب بوز

ومين مع السخط اتهني
 

فقد ايمانه وعاش مهزوز

ولا طالش نار ولا طال جنه

 والمجرمين عملوا له حبوب

للهلوسة لجل يبلم
 

ياخدها عقله يروح مقلوب 

ولو دبحته مايتألم
 

شارب حشيش واكل أفيون

عايش في وهم وغيبوبه
 

لا هو عاقل ولا مجنون

وإرادته دايما مسلوبه
 

جثث بتمشي ولابسه هدوم

لا هما أموات ولا أحياء
 

في الدنيا دي مالهومش لزوم

أجسام نيام وعنين صاحيه
 

الكيف سالبهم قوتهم 

واخد فلوسهم وفاقرهم
 

شرب الحشيش ده داء ملعون

وله ضرر معروف طبعا

واقدر اقول ان الأفيون 

زي الحشيش وكمان والعن

 سعيد مصيلحي